National Museum

Ang huli naming destinasyon noong araw na iyon para sa aming mini field trip ay ang National Museum of the Philippines. Ipinagbabawal ang pagkuha ng video at letrato na may flash  kaya mas natuunan namin ng pansin ang mga gallery sa loob.

Ang una naming pinasukan ay ang gallery kung saan matatagpuan ang Spoliarium. Nagulat ako sa laki nito. Mas malaki pa saamin ang mga tao sa obra na iyon. Syempre naman, likha iyon ng Pilipino, talagang kahanga-hanga! 

Marami pa kaming pinuntahang mga gallery doon kung saan maraming iba't ibang obra ang makikita. Mayroong mga painting na gawa ng mga pintor na Pilipino at maraming iba na unknown artist ang nakasulat sa tabi ng painting. Sa isang gallery na pinuntahan namin, maraming painting ang may isang misteryosong bilog sa langit. Hula namin, maaari itong isang UFO(Unidentified Flying Object) na nakikita ng mga tao noon sa langit kaya napapasama sa mga likha nila. Teorya lang naman iyon at masasabing kathang-isip lamang.

Mayroon ding mga gallery kung saan may mga sculpture at carvings na makikita. Napakaganda at nakahahalina ang mga ito! Parang totoong mga tao ang kaharap mo kapag tinignan mo sila. Sari-saring materyal ang mga ginamit sa paggawa ng mga iyon kagaya ng kahoy, marmol, plaster of paris, at iba pa. Pero may mga tanong kaming hindi naman namin nakuha ang kasagutan: bakit kaya ang karamihan sa mga carving sa isang gallery ay walang mga kamay o braso! Nakapagtataka subalit wala naman kaming nakuhang sagot pero ayos lang naman.

Nagtagal pa kami doon pero matapos naming pasukin ang lahat ng gallery na maaari naming pasukin, lumabas na rin kami. Pero syempre, dahil isa kaming masayang pangkat, hinding hindi mawawala ang mga pagkuha ng letrato na bunga ng kabaliwan!

Ito, masyado yatang seryoso ang larawang iyon! Mas masaya at baliw naman! Rock and Roll!

Diyan na natatapos ang aming pagpunta sa National Museum of the Philippines at ito na rin ang wakas  ng aming mini field trip! Ang National Museum ay isang napakagandang lugar na puntahan lalo na sa mga taong tumatangkilik ng sining at nakahahanap ng kaligayahan at kapayapaan dito. Masasabi kong sulit ang pumunta dito dahil makikita mo ang mala-totoong mga obra na likha ng mga Pilipino Kahit sino, bata man o matanda, babae man o lalaki, Pilipino man o dayuhan, ay siguradong mamamangha at matutuwa kapag pumunta dito.

Sa kabuuan, ang naging bunga ng aming paglalakbay sa maraming lugar ay nagbigay saamin ng higit pang kaalaman sa iba't ibang larangan lalo na sa kasaysayan ng ating bansang sinilangan. Dapat nating bisitahin ang mga lugar na ito dahil ito ang mga lugar na mayroon tayo at dapat nating ipagmalaki, at hindi ang mga tanawin sa ibang bansa dahil mas mahalaga ang alam natin at pinagdaanan ng ating mga ninuno bago natin makuha ang ganap na kalayaan. Nakakahiya naman kung may dumating na dayuhan at nagtanong tungkol sa ating bansa at hindi natin masagot! Parang sinasabi na rin natin na hindi natin mahal ang pagiging Pilipino at wala na tayong pakialam sa ating bansa. Kapag pumunta kayo sa mga tanawin sa Pilipinas, hindi lang aral ang mapupulot natin kundi mga alaala na madadala natin saan man tayo pumunta.

National Library

Pagkatapos ng aming paglalakbay sa Rizal Park, nagtungo naman kami sa National Library. Sa kasamaang palad nga lamang, sarado ito at under renovation pero pinapasok parin kami ng nagbabantay sa isang maliit na bahagi. 

Nakita namin ang napakaraming mga aklat na nasa lapag pa lamang at hindi pa naiaayos.

 Sandali lamang kami nanatili roon at nagkuhanan na lamang ng mga letrato para may alaala naman kaming maiuwi.

Isa pa!

Umalis na kami matapos makakuha ng ilang letrato. Kahit hindi namin nalibot ang buong lugar, masasabi kong maganda naman ito dahil hindi ito matatawag na National Library kung hindi ito may magandang kalidad. Kung gusto niyong makapagbasa ng mga aklat sa napakaraming mayroon itong lugar na ito, huwag na kayong magdalawang isip na pumunta rito!

Rizal Park

Una kaming pumunta ng aming pangkat sa Rizal Park. Ang unang lokasyong pinuntahan namin doon ay ang napakalaking monumento ni Lapulapu na gawa sa brass.  Napakalaki nito at napakaganda ng pagkakagawa! 

Sumunod naman ay pumasok kami sa  The Orchidarium at doon nagsimula ang aming ganap na pagkatuto sa aming mini field trip.

 

Tickets!

Dito, natutunan namin na napakarami palang uri at klase ng orchids. Sa lugar na ito, nagpapadami sila ng mga ito at inaalagaan nang husto. May mga prosesong dinadaanan ang bawat binhi bago sumibol at maging isang ganap na halamang orchid. Ang bawat klase nito ay may iba't ibang sukat ng panahon bago tumubo. Ayon sa gumagabay saamin doon, ang cattleya ang pinakamaselan kaya ito ang mas pinagtutuunan ng pansin. Pinapasok kami sa isang green house kung saan naroon ang lahat ng mga maliliit na halaman palamang. Nakasalansan nang maayos at napakalinis ng lugar, nakakagaan ng loob.  Ang bawat halaman ay may sariling code upang malaman kung anong panahon ito inilipat sa paso at kung sino ang mga magulang na halaman nito. Nabanggit din saamin na hindi kailangan ng espesyal na edukasyon para makapagtrabaho bilang tagapag-alaga ng mga orchids, maaaring sumama lamang sa mga seminar, pero mas maganda parin daw na may kaalaman na sa pag-aalaga ng mga ito.

 

Pero syempre, ang aming pagdayo rito ay hindi maaalisan ng kasiyahan! Minsan lang maging bata!

Nagkuhanan din kami ng mga letrato at naranasan naming magpaka-The Beatles.

Nagpakamodelo na rin kami! Minsan lang ang ganitong karanasan!

Nagpunta rin kami sa Hanging Bridge kung saan nagtakutan kami sa pamamagitan ng pagtalon doon dahil gumagalaw ito at nakakatakot na baka bumigay at mahulog kami! 

Diyan natapos ang aming pagtigil sa The Orchidarium Masasabi kong isa itong napakagandang lugar at napakapayapa. Mararamdaman mong nasa kalikasan ka dahil sa napakaraming puna at halaman, at mayroon ding mga paruparo at mga tutubi na nagliliparan sa paligid. Sulit na sulit ang punta niyo dito kung maisipan niyo man na dayuhin ko. Pero ang masasabi ko lamang, subukan niyo nang pumunta kapag may bakanteng oras kayo dahil malapit lamang ito at madaling makita.

Ang sumunod ko namang ipapakitang lugar na matatagpuan sa Rizal Park ay ang Busts of Heroes. Sa totoo lamang, hindi kami nakapagtagal doon dahil tapat na tapat ang araw noon at napakainit kaya dumaan lamang kami at nagbasa ng mga pangalan at ang konting impormasyon tungkol sa bayaning iyon. Karamihan sa mga bayani ay natatandaan kong napag-aralan ko na dati sa ika-anim na baitang pero konting impormasyon nalang ang natatandaan ko sa kanila. Isa parin itong magandang atraksyon kung gusto mong makilala ang mga bayaning nakibahagi upang makamit natin ang kalayaan tinatamasa natin ngayon.

Ang sumunod at ang huling pinuntahan namin sa Rizal Park ay ang monumento kung saan nakalibing ang labi ng ating pambansang bayani. Isa itong napakagandang atraksyon na puntahan dahil sa napakayamang kasaysayan nito. Gusto ko lamang na ibahagi sa inyo ang ilang trivia. Una, ang labi ni Rizal ay unang inilibing sa Paco Park at inilipat nalamang sa Rizal Park makalipas ang panahon. Ikalawa, hindi talaga mga kastila ang pumatay sa ating pambansang bayani kundi mga Pilipino rin! Sila ay napag-utusan lamang ng mga kastilang patayin si Jose Rizal dahil kung hindi, sila naman ang papatayin.

Dito na nagtatapos ang aming pagbisita sa Rizal Park. Sa kabuuan, isa itong napakagandang lugar na maaaring puntahan ng kung sino man dahil siguradong magiging masaya kayo sa inyong pagbisita at marami pa kayong matututunan na bagay na maaaring hindi niyo pa nalalaman noon!